'NDA  LL’ORTU

Mbivirava pumadora frischi i’chiantu

quandu i lattuchi si misinu a parrari:

avvùi, avvùi, acqua, acqua pur’annùi

c’avimu siti,  com’ e’ nostri cumpari.

Vers’idhi  si girau, tuttu curiusu

 e ndo pedi d’una scurgìu ‘n purtusu.

U surici – pinsau – npocu  llarmatu,

nci sta mangiandu tuttu u radicatu.

Avimu siti, non ndi dassàti sciutti

nu’ simu cca, belli frischi  pi’ tutti.

Tanti palati putim’ ancora saziari

si vu’ ndi putiti d’aqua mbivirari.

Nent’acqua pi’ vui,……. muriti prima.

A fini i ll’agghj  non vulimu fari,

chi sunnu morti nterra tutti scannati

e manch’ ‘e cipudhi vulimu ssimigghjari

pur’idhi nterra ancora nturciuniati.

Agghj e cipudhi sunnu morti e vivi,

vita e morti p’idhi è na misura,

comu nu mbriacu quandu mbivi,

seguinu sempri a leggi da natura.

Nent’acqua pi’ vui, ……. muriti prima,

nu pocu d’acqua e …. a spica nchianati!

acqua, acqua, dassati stari a rima,

datindi l’acqua ……  e ….. murimu saziati!

  frape